Nahimong malinawon ang pagsugod sa nobenaryo sa kapyestahan sa balaang bata nga si Señor Santo Niño de Cebu.
Bisan pa man og uwanon kaganihang kaadlawon, gidagsa sa halos 300,000 ka mga indibidwal ang Walk with Jesus diin miduyog sila sa prusisyon gikan sa Fuente Osmeña ngadto na sa Basilica Minore del Sto. Niño.
Matud ni Cebu City Police Office (CCPO) OIC-Director Col. Engelbert Soriano nga nagkahiusa na ang mga sakop sa kapulisan ug augmentation forces atol sa maong aktibidad.
Kini aron ipatuman ang hugot nga seguridad samtang nagpadayon ang mga aktibidad sa fiesta sa Balaang Bata.
Gikalipay usab niini ang maayo nga sitwasyon gumikan kay wala silay natalang insidente o naangol atol sa prusisyon.
Andam na usab ang 2,000 ka mga sakop sa kapulisan ug 10,000 ka mga force multipliers aron ideploy sa Sinulog route.
‘Walay signal shutoff apan…’
Samtang giklaro sa OIC-Director sa CCPO nga walay mahitabong signal shutdown atol sa Sinulog weekend.
Kini subay na sa unang pamahayag ni Cebu City Mayor Edgardo Labella subay na sa hugot nga seguridad sa fiesta.
Apan matud ni Soriano nga palungon ang signal sa mga mobile networks kung nakamatikod sila og mga suspected baggages.
Kung ma-clear man kini sa mga otoridad, mabalik na ang cellphone signal.
