CEBU CITY — Gipang-deploy na sa Commission on Human Rights (CHR)-7 og dugang pang mga imbestigador sa Negros Oriental aron matumbok ang responsable sa mga sagunson nga pagpatay sa maong lalawigan.
Sa pagpakighinabi sa Bombo Radyo Cebu kang Atty. Arvin Odron, ang regional director sa CHR-7, kini nagkanayon nga nalakip sa ilang imbestigasyon mao ang pagpatay sa upat ka mga police officers sa Ayungon ilabi na nga subject for evaluation na ang mga nahipos nga kasayuran.
Dugang pa ni Odron nga walay gipili ang CHR sa pag-imbestigar, pulis man o sibilyan ang biktima sa pagpatay sa tinguha nga makuha gayud ang hustisya.
Gani nagpabiling concerned ang maong ahensya sa mga sunud-sunod nga pagpatay sa Negros Oriental.
Samtang anaa sa kustodiya sa kapulisan ang tulo ka gituohang sakop sa New People’s Army alang sa inquest proceedings.
Kini human nga gisikop sa kapulisan ang mga dinakpan nga silang Marlon Basalo, Ronnie Herebias, ug Danny Harold Tancinco sa Badian, Cebu.
Una nang gikumpirmar ni Police Regional Office (PRO)-7 Director Brigadier General Debold Sinas nga ang tulo ka mga dinakpan maoy gituohang nagpatay sa upat ka mga sakop sa Regional Mobile Forces Batallion sa Ayungon, Negros Oriental.
