CEBU CITY — Nasikup ang kanhi sakup sa Police Regional Office 7 sa gipahigayun nga buybust operation sa Provincial Intelligence Branch sa Barangay Poblacion, lungsod sa Pinamungajan.
Giila ang nadakpan nga si kanhi Police Corporal Christian Ando, residente sa nahisgutang lungsod.
Sa interview sa Bombo Radyo kang Police Lt. Colonel Marlu Conag, PIB chief, gisaysay niini nga dugay na nila nga gi-monitor ang iligal nga kalihukan ni Ando hangtud sa misangput sa ilahang malampuson nga operasyon.
Matud ni Lt. Col. Conag nga usa ka high value target si Ando lukup probinsiya sa Sugbo. Nakuha-an si Ando ug shabu nga nagkantidad ug P80,000.
Basi sa gipahigayun nga tactical interrogation sa PIB ngadtu sa kanhi pulis, mitug-an kini kung asa nagagikan ang supply niini sa shabu rasun nga nagpahigayun ug follow up operation ug misangpit sa pagkasikup sa supplier ni Ando sa Barangay Duljo Fatima, dakbayan sa Sugbo kung diin nakuha-an kini ug shabu nga nagkantidad ug P170,000.
Una niini, gi-asuy ni Lt. Col. Conag nga nag-AWOL si Ando sa iyahang trabaho isip pulis sa Lapu-Lapu City Police Station 2 sulod sa duha ka semana gumikan kay giingung na ‘low moral’ kini human nga gi-hold ang allowance niini.
Dugang pakisusi, nasayran nga nag-atubang usab ang dinakpan ug kasong carnapping ug nasikup sa mga sakup sa Pinamungajan Police Station apan nakapyansa.
Sa dihang nakagawas sa prisohan, giingung diha na nagsugud nga migamit kini ug iligal nga drugas hangtud nga kini na mismo ang namaligya.
Mag-atubang ug kasong kalapasan sa Comprehensive Dangerous Drugs Act si Ando samtang anaa kini karun gikustodiya sa PIB.
