CEBU CITY-Nagsugod na sa ilang road side inspection ang Land Tranportation Office (LTO-7) para sa luwas nga pagbiyahe sa mga katawhan sa kalag-kalag.
Kini ang gibutyag ni Regional Director Victor Caindec sa LTO-7. Matud pa nga aduna na’y dul-an 500 ka mga police personnel ang gi-deputize sa LTO. Dugang pa ni Caindec nga adunay Malasakit Center sa N.Bacalso kung diin mamahimo nga makasulod o makapahuway dinhi ang mga senior citizen nga way kuyog ug mga buntis.
Aduna usab ambulansya ug special response unit nga naka-standby kung adunay mga disgrasya o emergency nga mahitabo.Hangyo ni Caindec sa mga bus nga di gyud mag overloading aron sa pagsiguro nga luwas nga makabiyahe ang mga katawhan.
Subay niini gimandoan na ni Caindec ang iyang mga sakop nga kung naay makit-an nga nag overloading lang gihapon ipapara gyud kini ug pamultahon og P5,000 sa 1st offense.
Adunay hotline nga ihatag usab karon ang LTO-7 kung diin dinhi ipahibaw ang mga reports sa mga reckless driving ug uban pa. Dugang usab nga hangyo ni Caindec ngadto sa mga pasahero nga gikinahanglang tan-awon daan ang plate number sa ilang sakyan aron kung ugaling kaskasero mopadagan ang driver dali kini nga ma-report./
Gilauman usab nga mo bisita karong adlawa si Governor Gwendolyn Garcia sa Cebu South Bus Terminal (CSBT) alang sa pagtan-aw sa sitwasyon sa maong terminal.
‘Special Permits‘
Anaa pa sa mga 47 ka mga units ang nakalokat ug special permit sa Land Transportation Franchising and Regulatory Board (LTFRB-7) alang sa pagbiyahe sa kalag-kalag.
Kini ang gibutyag ni Regional Director Eduardo Montalto. Matod pa, nga 27 niini mubiyahe sa habagatang bahin sa probinsya sa Sugbo samtang 20 usab sa amihanang bahin.
Kutob sa Nobyembre 5 ang coverage sa maong special permit. Gilaoman usab ni Montealto nga mas mudaghan pa ug mang-lokat ug special permit karong adlawa gumikankay karon usab gilaoman nga mas mudaghan ang pasahero nga manguli sa tagsa-tagsa nila ka probinsya.
Gi-pokosan usab sa LTFRB ang pagbantay sa mga terminal samtang ang LTO na ug ang highway patrol group ang anaa sa mga kadalanan.
Aduna lang silay ipahigayon nga road side inspection apan di kaayu sila mopalayo sa terminal. (Lahvi Quiñones)
