CEBU CITY-Nagsugod ug nahibalik na ang night market sa dalan Colon kung diin gidumog usab kini sa mga mamalitay.
Kini human usab gisaad ni Cebu City Mayor Edgardo Labella nga ibalik niya ang night market ug dinhi niya ipapuwesto ang mga ‘displaced sidewalk vendors’ nga wala usab nakapuwesto sa Tabo sa Banay.
Makita sa night market ang mga stall nga nahimutang sa tunga sa kalsada nga dunay nagkadaiyang baligya sama sa mga sinina, sapatos, gadget accessories ug uban pa.
Samtang makita usab sa kilid sa kalsada ang mga sidewalk vendors nga naninda og mga pagkaon sama sa tempura, prutas, ug ingon man mga manok ug puso o mas inila nga pungko-pungko.
Samtang human usab nga gitugotan ni Mayor Labella nga makatinda ang sidewalk vendors balik sa ilang pwesto sa dalan Colon matag Sabado ug Dominggo, mabantayan usab nga namalik na ang mga manindahay.
