CEBU CITY — Gipaubos na sa lockdown ang Brgy. Labangon, dakbayan sa Sugbo human nga niabot na sa lima ka mga residente ang nagpositibo sa coronavirus disease o COVID-19.
Matud ni Kapitan Vic Buendia nga sirado na ang mga dalan nga nagpalibot sa iyang barangay sama lang sa Katipunan, Happy Valley, Tres de Abril, ug Katipunan.
Dugang pa niini nga ang makaagi lang sa maong lugar mao ang mga nag-deliver sa mga essential goods paingon sa Labangon.
Gikatakdang mo-isyu og “pink pass” ang barangay alang sa mga residente alang sa ilang seguridad.
Gi-angkon usab ni Buendia nga nagkuwang sila sa mga sakop sa kapulisan ug ang mismong mga barangay tanod ug volunteers ang nagbantay sa mga agi-anan.
Hinuon, nasayud nang daan ang hepe sa Punta Police Station sa maong kabalak ug nanghinaut mismo ang kapitan nga mahatagan kini og pagtagad sa PNP ug sa City Government.
Kini aron masiguro ang kahapsay sa barangay ug mapatuman gayud ang mandato nga magpabilin sa tagsa-tagsa ka mga panimalay.
