CEBU CITY- Pagabuhatan og Master Plan ang giplanong housing site project sa kagamhanang dakbayan sa Sugbo pinaagi sa City Planning and Development Office (CPDO) ang luna sa Barangay Kalunasan sa proyektong socialized housing.
Kini human sa gibuhat nga ocular inspection sa Task Force Pabalay sa luna nga gipanag-iya sa dakbayan nga gidonar ngadto sa Department of Environment and Natural Resources (DENR)-7 ug sa “Evangelical Free Church”.
Sa eksklusibong pakighinabi sa Bombo Newsteam kang Cebu City Councilor Jerry Guardo, ang Chairman sa Committee on Infrastructure ug housing overseer, gipa-ambit niini nga sa iyahang pagbisita sa maong dapit ilahang nakita ang kahaom sa lugar isip kabutangan sa socialized housing sa kagamhanang dakbayan og musulbad sa housing crisis niini.
Uban sa maong ocular inspection sila Atty. Jade Ponce, ang pangu sa Land Management Office; Atty. Ronald Anthony Librando, executive director sa Division for the Welfare of the Urban Poor (DWUP); ug mga tinugyanan sa CPDO, DWUP, ug sa Cebu City Environment and Natural Resources Office (CCENRO).
Matud ni Atty. Ponce, gihuwat na lang ang “go signal” ni Cebu City Mayor Raymond Alvin Garcia aron kasugdan ang proseso sa pagbawi sa maong mga luna, gumikan kay aduna na kini pagsanong gikan sa City Attorney’s Office.
Sa iyang bahin, niingon si Librando nga 1,000 ka mga housing units ang kinahanglan nga matukod dayun sa dakbayan.
