SOUTH KOREA-Nagtapok ang liboan ka mga South Koreans sa Seoul samtang ang Corruption Investigation Office for High-ranking Officials (CIO) nangandam sa paghimo sa ikaduhang arrest attempt kang Presidente Yoon Suk-yeol diin may kalabotan sa iyang mubo ug napakyas nga deklarasyon sa martial law niadtong Disyembre 3, 2024.
Kahinumdoman nga napakyas ang miaging arrest attempt sa mga imbestigador sa CIO kang Yoon human sila gibabagan sa presidential security service nga milungtad og 6 ka oras.
Nagtapok ang mga tigpaluyo sa anti-Yoon sa mga nag-unang kadalanan sa sentro sa Seoul bisan pa sa below zero degrees nga temperatura aron idemanda si Yoon, samtang ang uban nanawagan alang sa iyang impeachment.
Samtang, nagpahigayon usab og rally ang mga supporters ni Yoon sa gawas sa iyang presidential residence sukad sayo sa Sabado sa buntag sa wala pa ang usa ka dako nga demonstrasyon nga gilusad sa sentro sa Seoul.
