CENTRAL VISAYAS-Nakatala ang rehiyon sa Central Visayas nga gilangkoban sa pagkakaron sa probinsya sa Sugbo, Bohol, Negros Oriental, ug Siquijor sa employment rate sa 97.1% para sa tuig 2024.
Kini nga datos ang giluwat base sa pinakabag-ong Labor Force Survey (LFS) nga gipagawas sa Philippine Statistics Authority – Central Visayas (PSA-7) ug Department of Labor and Employment – Central Visayas (DOLE-7) diin nagpakita nga mas taas kini kun itandi sa 95.4% nga employment rate record sa tuig 2023.
Subay niini kay aduna kiniy 2.9% sa unemployment rate ug 8.6% nga underemployment rate sa rehiyon.
Matod pa ni Jessica Adlawan Uy, ang hepe sa Technical Support Services – Workers and Employment sa DOLE-7 ng ang industriya sa call center o Business Process Outsourcing (BPO) kay maoy nag-una nga nagdalit og trabaho sa Sentrong Kabisay-an.
Lakip usab sa mga nangunang sektor sa pagpang trabaho ang wholesale ug retail trade, hotels ug restaurants, manufacturing, ug human resource outsourcing.
Gani gidasig sa opisyal ang mga jobseekers nga ipalambo pa ang ilang kahanas pinaagi sa pagsalmot sa mga nagkadaiyang job fairs o sa lokal nga Public Employment Services Office (PESO) alang sa libreng mga serbisyo ug pasilidad sa pagpanarbaho.
Ang pagtaas sa employment rate sa rehiyon nagpakita sa positibo nga kalambuan sa ekonomiya sa Central Visayas.
