Nasuta nga kapin sa P115 bilyones ang gigahin alang sa gitawag nga “shadow” o dili klaro nga flood control projects karong tuiga.
Kini base sa pagtuon sa University of the Philippines National College of Public Administration and Governance (UP-NCPAG).
Nakita sa pagtuon nga ang “shadow” flood control budget, nga nagtumong sa mga proyekto nga wala maapil sa opisyal nga Flood Management Program (FMMP), padayon nga mitaas pag-ayo sulod sa mga katuigan, gikan sa P81.552 bilyones niadtong 2022 ngadto na sa P115.262 bilyones sa 2025.
Sumala sa UP-NCPAG, ang ubang mga bahin sa General Appropriations Act (GAA) nga adunay kalabutan sa alokasyon alang sa Disaster Risk Reduction and Management (DRRM) kinahanglan usab nga susihon sa parehas nga gidak-on.
Matod nila nga sa niaging 15 ka tuig, ang Department of Public Works and Highways (DPWH) nakadawat og kinatibuk-ang P7.9 trilyon diin labing dako kon itandi sa ubang mga ahensya. Bisan pa niini, nagpabiling grabe ang epekto sa mga katalagman ug baha sa nasud.
Sumala sa datos, klaro nga ang problema dili lamang sa kakuwang sa pundo kon dili sa pagdumala, transparency, ug accountability.
Gidugang sa pagtuon nga ang tinuod nga hagit karon mao ang pagsiguro nga ang matag piso nga gigahin sa pagpanalipod sa mga komunidad tinuod nga nagserbisyo sa katawhan, ug dili mapaingon sa bulsa sa hakog nga indibidwal.
