Gibutyag sa Philippine Institute of Volcanology and Seismology (Phivolcs) nga ubos kaayo ang posibilidad nga moigo pag-usab ang laing kusog nga linog sa amihanang bahin sa Sugbo sa umaabot nga mga katuigan.
Gipasabot ni DOST-Phivolcs Director Dr. Teresito Bacolcol nga base sa ilang historical data ug natural nga strain buildup sa mga fault lines, posible pang molanat og gatusan ka tuig una makatigum og igo nga kusog ang fault aron usab mapugos og dakong pagtay-og sama sa magnitude 6.9 nga linog nga miigo sa probinsya niadtong Setyembre 30.
Apan, giklaro usab sa ahensya nga dili pa nila masiguro ang kahimtang sa habagatang bahin sa Sugbo, diin gikinahanglan pa ang dugang nga pagtuon ug mas hapsay nga monitoring sa mga fault system sa maong dapit.
Samtang, nagpabilin gihapon ang pahimangno ni Bacolcol sa katawhan.
Sa laing bahin, si Phivolcs Seismology Division Chief Winchelle Sevilla mitug-an nga ang bag-ohay lang nga linog posibleng resulta sa paglihok sa usa ka fault line nga dugay nang wala molihok o “nakatulog.”
Gi-awhag usab sa Phivolcs ang mga lokal nga opisyal ug katawhan sa padayon nga partisipasyon sa mga earthquake drills, disaster preparedness training, ug pagbansay sa kahimtang sa emerhensiya.
