Nakig-alayon ang Civil Aviation Authority of the Philippines (CAAP) sa mga katugbang niini sa Malaysia ug Singapore aron monitoron ang tulo ka rehistradong air assets sa miresign nga kanhi Ako Bicol Partylist Rep. Zaldy Co.
Kini ang gipamahayag ni CAAP Director General Raul del Rosario human sa pahibalo sa ahensya nga duha ka AgustaWestland helicopter nga nalambigit sa Co ang anaa karon sa Kota Kinabalu, Malaysia, nga giingong milupad didto niadtong Agosto 20 ug Septyembre 11.
Ang Gulfstream aircraft gikataho nga naa sa Singapore sukad pa niadtong Agosto 16.
Gawas sa tulo ka air assets sa Co, gimonitor usab sa ahensya ang 10 pa nga nagpabilin sa nasud.
Kahinumduman nga sa miaging bulan, gibutyag ni DPWH Sec. Vince Dizon nga gibabagan sa CAAP ang pagsulay sa mga kompanya nga nalambigit kang Co nga i-deregister ang tulo ka choppers nga gihangyo sa DPWH nga i-freeze.
Samtang, gibutyag sa usa ka opisyal sa CAAP nga walay air assets nga narehistro ubos sa ngalan sa kanhi House Speaker Ferdinand Martin Romualdez.
Ingon man nga sila si Co ug Romualdez nalambigit sa isyu sa mga anomalosong proyekto sa flood control nga giingong nakadawat og kickbacks, butang nga balik-balik nga gipanghimakak sa duha. | via Bombo Ken Apor
