Gihimug-atan sa usa ka environmental expert nga kinahanglang manubag ang Cebu City Planning and development office kalabot sa pag-isyu sa locational clearance sa Monterrazas de Cebu Project.
Kini bisan paman sa kadelikado ug sa mga posibleng mamugna nga problema sa naasoy nga proyekto, hilabi na ang mga komunidad nga anaa sa ubos nga bahin sa Monterrazas.
Matud ni Gus Agosto, Environmental planner nga kwestyonable ang pag-isyu sa locational clearance gumikan kay gikonsiderar kini nga active hazard zone diin posibleng modahili ang yuta ug moresulta sa pagbaha.
Busa, angayan lang nga susihon pag-ayo sa mga nag-imbistigar aron mahatagan gayud og katin-awan kung nganong naaprobahan ang pagkubkob sa maong bukid.
Apan, gitataw sa CPDO nga nakapasar ang maong subdivision inay pokusan nalang ang problema sa mga suba sa Butuanon ug Mananga kaysa sa Monterrazas.
Sa pagkakaron, gimando na sa Department of Environment and Natural Resources (DENR) ang hinanaling paghunong sa tanang mga kalihokan sa konstruksyon sa Monterrazas development human nadiskobrehan sa mga inspektor nga kapin sa 700 ka mga punoan ang giputol nga walay mga permit.
Gikanayon ni DENR-7 Executive Director Laudermir Salac nga ang proyekto nakalapas usab sa 10 ka mga kondisyon sa environmental compliance certificate, nga misangpot sa pag-isyu og notice of violation ug stoppage order.
Mag-atubang na usab og kasong criminal ug kinahanglan nga hulipan sa mga developer ang matag lumad nga kahoy nga giputol og 100 ka bag-ong mga kahoy. via Bombo Rexmond Omega
