Personal nga miadto sa opisina sa National Bureau of Investigation (NBI) gahapong adlawa ang kontraktor nga si Sarah Discaya, kini nunot sa pamahayag ni Presidente Ferdinand Marcos Jr. nga siya dakpon inig-isyu sa warrant sa korte.
Si Discaya nag-atubang og mga kasong malversation ug graft nga gisang-at sa Office of the Ombudsman kalabot sa anomalosong proyekto sa pagkontrol sa baha sa Davao Occidental.
Ang proyekto, nga nagkantidad og P96.5 milyon, gideklarar nga nahuman niadtong 2022 apan nakit-an nga wala kini naglungtad human sa imbestigasyon sa CIDG.
Konektado usab siya sa mga kompanya nga nakadaog sa dakong bahin sa mga kontrata sa pagkontrol sa baha, lakip ang Alpha & Omega General Contractor & Development Corporation.
Apil usab sa kaso ang pipila ka mga opisyal sa Department of Public Works and Highways (DPWH) nga nalambigit sa maong proyekto.
Sumala sa Presidente, ang mga nalambigit sa korapsyon dili makalingkawas sa hustisya ug ang warrant gilauman nga ipagawas karong semanaha.
