Gipakusgan sa Lapu-Lapu City Police Office (LCPO), ubos sa pagpangulo ni PCOL Antonietto Y Cañete, Officer-in-Charge, ang ilang mga pagpangandam sa seguridad alang sa Traslacion 2026 aron masiguro ang malinawon, hapsay ug matinahuron nga pagpatuman sa relihiyosong kalihokan.
Isip kabahin sa komprehensibong security preparations, personal nga nagpahigayon og ocular visit ug site inspection si PCOL Cañete sa Nuestra Señora de Regla Parish–National Shrine sa Barangay Poblacion, Lapu-Lapu City.
Gi-evaluate sa kapulisan entrance ug exit sa simbahan, mga pamaagi sa crowd control, ug mga traffic route padulong sa Naval Forces Central (NAVFORCEN), subay sa gipaabot nga daghang deboto nga motambong sa Traslacion.
Nagpahigayon usab ang LCPO og Pre-Deployment Briefing alang sa ilang mga personnel sa LCPO Grounds sa Barangay Pusok. Gitutukan sa briefing ang kahandam sa operasyon, hapsay nga koordinasyon, ug hustong deployment sa kapulisan atol sa Traslacion 2026.
Kapin sa 400 ka PNP personnel ang i-deploy sa LCPO, uban ang suporta sa ubang ahensya sa gobyerno ug force multipliers, aron masiguro ang kaluwasan ug seguridad sa tanang deboto ug manan-aw sa tibuok relihiyosong kalihokan.
Nagpabiling andam ang LCPO sa pagmintinar sa kalinaw ug kahapsay, pagpalig-on sa police visibility, ug pagpanalipod sa seguridad sa publiko pinaagi sa hugot nga koordinasyon ug kooperasyon sa komunidad, samtang nagkaduol ang Traslacion 2026.
