Gikalipay ni Leyte Rep. Ferdinand Martin Romualdez ang pag-aprubar sa usa ka balaodnon nga maghatag og gahum kang Presidente Ferdinand Marcos Jr. sa temporaryong pagsuspenso o pagpakunhod sa excise tax sa mga produktong petrolyo ubos sa pipila ka mga kondisyon.
Si Romualdez miingon nga ang balaodnon makatabang sa Presidente sa pagtubag sa mas paspas sa krisis sa lana ug sa nag-usab-usab nga presyo niini, ug makahatag og kahupayan sa publiko, labi na sa mga kabus ug huyang nga sektor.
Dugang pa niini nga ang pagsuspenso o pagkunhod sa excise tax makapaubos sa presyo sa retail oil og P6 ngadto sa P10 kada litro.
Ang House Bill No. 5779 ni Romualdez usa sa 15 ka balaodnon ug duha ka hiniusa nga resolusyon nga gihisgutan sa House Committee on Ways and Means. Sa iyang balaodnon, iyang gisugyot ang hingpit nga pagtangtang sa excise tax sa mga produktong petrolyo alang sa dugay nga kahupayan sa publiko.
Hinuon, giila usab sa Leyte Solon ang panginahanglan sa gobyerno nga magpadayon sa pagsalig sa binilyon ka pesos nga koleksyon sa excise tax aron pondohan ang mga hinungdanon nga social services.
Nanawagan usab si Romualdez sa mga kompanya sa lana nga ibutyag ang kantidad sa ilang kasamtangang imbentaryo diin nabayran ang excise tax.
Matod niya nga importante alang sa mga kompanya nga klarong isulti kung unsang stock ang ibaligya nga adunay excise tax ug unsang umaabot nga mga suplay ang ibaligya nga wala kini aron ang publiko magiyahan sa husto.
