Nitibugsok sa kapin P59 ang $1 sa Pilipinas niadtong Biyernes, Marso 13, human sa siyam ka adlaw nga pag-ubos batok sa dolyar, sumala sa datos gikan sa Bankers’ Association of the Philippines (BAP).
Sa pagsirado, ang peso anaa sa P59.735 baylo sa $1, nga misaka og 35 centavos gikan sa P59.385 niadtong Huwebes, Marso 12.
Nahibaw-an nga ang pag-ubos sa piso gipahinabo gihapon sa kombinasyon sa mas taas nga presyo sa lana, mas lig-on nga dolyar, ug bag-ong pag-amping sa mga mamumuhunan tungod sa geopolitical tensions.
Kini giubanan sa pagsaka sa presyo sa enerhiya ug trade deficit, samtang ang global uncertainty nagduso sa mga pondo ngadto sa luwas nga mga dapit sama sa dolyar.
Mahimo usab kini nga resulta sa “mixed signals” gikan sa administrasyon ni U.S. President Donald Trump ug bag-o nga datos sa foreign direct investments (FDI), sumala sa mga eksperto.
Ang pasiunang datos gikan sa Bangko Sentral ng Pilipinas (BSP) nagpakita nga ang net FDI inflows sa nasud kay $7.8 bilyon para sa Enero–Disyembre 2025, mikunhod og 17.1% gikan sa $9.4 bilyon sa samang panahon sa 2024.
Ang piso lagmit magpabilin nga dili mausab tali sa P59 ug P59.50 sa umaabot nga mga adlaw, depende sa presyo sa lana ug sa paghupay sa tensyon sa Middle East, sumala sa pipila ka mga ekonomista.
