Napanglangtawan sa Cebu Electricity Rights Advocates (CERA) nga gawas sa pagsaka sa mga presyo sa batakang palaliton, adunay dakong posibilidad nga mosaka usab ang presyo sa kurente, subay na sa padayong pagsaka sa presyo sa lana sa kasamtangan nunot sa padayong tensyon sa Middle East.
Apan, giklaro niini nga bisan paman nga dili masalikway ang posibleng pagsaka sa presyo sa kurente, dili ingun nga sobra kadako ang pagsaka niini.
Kini gumikan kay ang mga distribution utilities, naka kontrata man og 16-25 years sa Power Supply Agreement.
Mao kini ang gikabutyag ni Nathaniel Chua ang Convenor sa Cebu Electricity Rights Advocates, diin iyang gipasabot nga kini nga kasabutan gikan sa planta ug sa distribution utilities, wholesale kini nga gipalit sulod sa taas nga panahon aron masiguro nga kung adunay mga emerhensya, dili kaayo taas og saka sa presyo ang ipahamtang.
Samtang, gikabutyag ni Chua nga adunay commitment nga sa tuig 2030, pasakaan ngadto sa 30% sa power supply nga gikan sa renewable energy, ug matod niya, kung lantawaon ang mga distribution utilities, naningkamot kini nga mopalit sa renewable energy.
Apan matod niya, sa Sugbo, kasaragan sa suplay sa kurente mao ang renewable man o trasdisyonal, nagpabilin gihapon kining gi-import sa Mindanao, ug sa Leyte, tungod kay dakong kakuwangan pa sa planta sa kurente dinhi sa Sugbo.
Hinungdan nga mao kini ang usa sa mga nag-una nga gipanawagan nga madugangan ang planta sa kurente sa Sugbo, tungod kay aduna nay 160 megawatt nga shortage kung padayon ang tensyon sa langyaw nga mga nasud.
Dugang niini, napanglantawan usab ni Chua nga kining panawagan ron sa kadaghanan nga temporaryo nang libkason ang VAT ug excise tax, maayo kini.
Hinungdan nga miuyon siya niini aron usab nga makatagamtam og alibyo ang mga katawhan taliwala na sa mga dakong krisis nga giatubang karon.
