Andam nga makig-alayon ang Cebu City Police Office (CCPO) sa Regional Civil Security Unit Region 7 ug Police Regional Office 7 (PRO-7) alang sa pag-trace sa security agency nga giapilan sa usa ka security guard nga giingong tag-iya sa Glock 9 pistol nga gigamit sa mass shooting incident sa Tacloban City, kung gikinahanglan ang ilang tabang.
Kini ang gipahayag ni Plt. Col. Franco Oriol, tigpamaba sa CCPO, nga miingon nga adunay na’y koordinasyon tali sa Police Regional Office 8 (PRO-8) ug ilang counterparts sa Region 7 kalabot sa imbestigasyon sa mga armas de fuego nga giingong na-delist gikan sa OSCA records ug narehistro na sa usa ka security agency sa Dakbayan sa Sugbo.
Matud ni Oriol, nagpadayon ang koordinasyon tali sa PRO-8 ug Regional Civil Security Unit 7 (RCU-7), ilabina sa pag-verify sa ownership sa armas ug pag-monitor sa mga security agencies nga adunay rehistradong firearms.
Apan gipatin-aw sa opisyal nga wala direktang nalambigit ang CCPO sa maong imbestigasyon ug wala pa usab kini makadawat og direktiba alang sa paghimo og parallel investigation.
Dugang niya, kung adunay mando gikan sa ilang hepe o regional director, andam ang CCPO nga motabang sa RCU-7, ilabina sa pagpangita sa mga persons of interest ug pagpahigayon og mga interbyu.
Sa laing bahin, kalabot sa seguridad sa pagbukas sa klase, mipadayag ang kapulisan nga nag-deploy sila og mga personnel sa nagkalain-laing eskwelahan pinaagi sa police assistance desks ug mobile patrol units.
Tumong niini ang pagpalig-on sa police visibility ug paghatag og seguridad batok sa bullying ug uban pang posibleng insidente sulod sa mga kampus.
Gipahigayon usab sa mga station commanders, kauban ang community relations units, ang mga dayalogo uban sa mga magtutudlo, estudyante, ug ginikanan aron masuta ang ilang mga kabalaka ug malikayan ang mga insidente sa eskwelahan.
Sumala sa CCPO, sukad sa pagbukas sa klase, wala pa’y naitalang seryosong insidente sama sa pagdala og armas, hait nga mga butang, o kagubot sulod ug gawas sa mga eskwelahan.
Gipasalamatan usab sa kapulisan ang suporta sa mga opisyal sa barangay, mga eskwelahan, ug traffic management units sa pagmintinar sa kalinaw ug kahapsay atol sa pagbukas sa klase.
