Gikahadlokang anaa sa kapin 500 ka mga tawo ang namatay human nalunod ang duha ka sakayan sa baybayon sa Myanmar sa miaging mga adlaw, sumala sa taho sa mga ahensya sa United Nations (UN).
Ang unang sakayan nawad-an og kontak human milawig nga adunay 250 ka mga tawo nga sakay.
Samtang, ang ikaduhang sakayan gituohan nga nalunod sa baybayon sa Ayeyarwady sa Myanmar nga adunay 280 ka mga pasahero.
Nasayran usab nga kadaghanan sa mga pasahero mga refugee gikan sa minoryang Rohingya Muslim.
Sumala sa UN High Commissioner for Refugees (UNHCR) ug sa International Organization for Migration (IOM), ang mga sakayan mibiyahe gawas sa regular nga “season sailing” kung ang kadagatan mabalod ug delikado.
Ang mga Rohingya kanunay nga mosakay sa mga sakayan nga kahoy aron makaikyas sa kapintasan sa Myanmar ug sa mga puno nga kampo sa mga refugee sa Bangladesh.
Tumong nila nga makaabot sa mga silingang nasud sama sa Malaysia, Indonesia, o Thailand sa paglaum nga luwas ug adunay oportunidad.
