Gipaambit ni Akbayan Party-list Rep. Percival ‘Percy’ Cendaña nga atol sa ika-limang State of the Nation Address (SONA) ni Presidente Ferdinand Marcos Jr. kagahapon, anaa siya sa kongreso ug naminaw siya sa kinatibuk-ang pakigpulong sa Presidente ug matod niya, gikuwangan kaayo sa unod sa SONA sa Presidente.
Sa eklskusibong pakighinabi sa Bombo Radyo Cebu kang Cendaña, iyahang gihulagway nga ‘daw’ “sachet governance” ang kasamtangang administrasyon gumikan kay, tuod, nahisgutan niini ang problema, pero ang solusyon nga gilatad sa goberyno pino kaayo ug ginagmay lang.
Gani, gi-ehemplo ni Cendaña ang nahisgutan sa Presidente ang kaylap nga korapsyon sa nasud, ilabi na sa flood control scandal nga bisan og tuig na ang milabay sa panaad sa presidente, hinay ang usad sa pag-file og kaso sa mga nalambigit niini.
Samtang, sa hisgutanan usab sa pagpahibalo sa Presidente nga ang kanhi Speaker Martin Romualdez sa dili madugay pasakaan na og kaso nga may kalabotan sa giingong korapsyon sa mga proyekto sa pagkontrol sa baha.
Alang kang Cendaña, ang pagpasaka og kaso sa usa ka gidudahang akusado molatid og usa ka tuig, diin gihinomdoman usab niya nga sa Hulyo 2025, gibuhian sa presidente ang pamulong nga “Mahiya naman kayo,” apan usa sa iyahang gihumug-atan og kung nganung nabalaka siya pag-ayo sa maong hisgutanan, wala mahisgutan sa presidente kung asa ang nahimutang sa kanhi house speaker, ug ingun na si Former Ako Bicol Partylist Rep. Zaldy Co nga padayong gipangita sa awtoridad kay hangtud sa kasamtangan, gawasnon gihapon kini sa mga kasong giatubang niini.
Ingun man iyaha usab gilatid nga wala gayud mahisguti sa Presidente ang 15 ka mga kontraktor nga aduna gihapoy kalambigitan sa korapsyon sa mga flood control projects, diin usa palang sa 15 ang nakasohan, hinungdan nga alang kaniya, gayaya lang solusyon ug inisyatiba sa kasamtangang administrasyon.
