PROVINCE OF CEBU- Gipahinumdoman ni Cebu Governor Pamela Baricuatro ang mga Sugboanon nga magpabiling alerto ug magtinabangay sa pagpugong sa dengue, human nakarekord ang Cebu Provincial Health Office (PHO) og 381 ka kumpirmadong kaso sa tibuok probinsya sa bulan sa Hulyo.
Matod sa mga health authorities, posible nga nalambigit ang padayon nga pag-ulan sa pagsaka sa mga kaso sa dengue karong buwana, tungod kay mas daghang dapit ang mahimong pamuy-an sa mga lamok nga nagdala sa maong sakit.
Tungod niini, gidasig ni Baricuatro ang matag panimalay nga mahimong mas maampingon ug proaktibo sa pagpugong sa dengue.
Iyang gipahinumdoman ang publiko nga ang lamok nga nagdala sa dengue mahimong mamunga bisan sa limpyo nga tubig nga napundo sulod sa pipila ka adlaw.
Gihangyo niya ang mga residente nga kanunayng susihon ug limpiyohan ang palibot, wagtangon ang mga sudlanan nga adunay nagtigom nga tubig, ug siguruhong hapsay nga natabunan ang mga imbakan sa tubig.
Girekomenda niini, nga buhaton kini sa labing menos kausa matag semana aron mapugngan ang pagpamunga sa mga lamok.
Giduso usab sa gobernador ang kahinungdanon sa sayong pagkonsulta sa health center o ospital kon adunay makita nga sintomas sa dengue aron malikayan ang posibleng grabeng komplikasyon.
Gipasiugda ni Baricuatro nga ang pagpugong sa dengue nagsugod sa matag panimalay pinaagi sa pagmintinar sa limpyo nga palibot ug pagwagtang sa mga dapit nga mahimong pamuy-an sa mga lamok.
Samtang, gikumpirma sa PHO nga adunay duha ka namatay tungod sa dengue, nga gikan sa Consolacion ug Compostela.
Bisan pa niini, gipahayag ni Public Health Consultant Dr. Nikki Catalan nga padayon ang pagmonitor sa sitwasyon sa tanang LGUs ug wala pa ideklarar nga dengue outbreak ang probinsya.
