Gimandoan ni Commission on Elections (COMELEC) Chairman George Erwin Garcia ang Philippine National Police (PNP) ug Armed Forces of the Philippines (AFP) nga imbestigahan ang pag-ambush sa convoy sa Bangsamoro Autonomous Region in Muslim Mindanao (BARMM) interim Chief Minister Abdulraof Macacua.
Matod ni Garcia, kinahanglan nga manubag ang mga responsable sa maong insidente.
May kalabotan man sa eleksyon o wala, giingon ni Garcia nga importante ang pagmintinar sa kalinaw ug kahusay sa lugar, ingon man ang pagsiguro sa kaluwasan sa matag tawo ug pagtahod sa mga konstitusyonal nga katungod nga gilatid sa balaod.
Kahinumduman nga gi-ambush ang convoy ni Macacua niadtong Sabado, Agosto 15, samtang nagbiyahe kini padulong sa Cotabato City gikan sa Maguindanao del Norte.
Mitambong si Macacua sa usa ka panagtapok sa Bangsamoro Federalist Party sa wala pa ang insidente.
Naluwas si Macacua ug ang iyang mga kauban human wala sila mohunong ug mipadayon sa pagbiyahe hangtod nga nakaabot sa Bangsamoro Government Center sa Cotabato City.
