Nisaad ang Regional Tripartite Wages and Productivity Board (RTWPB)-7 nga himuong transparent ug inklusibo uban sa pagsugod sa proseso sa pagtino sa minimum nga sweldo sa Central Visayas.
Matod pa sa usa ka pamahayag sa Central Visayas wage board, gikanayon niini nga ilang tagdon ang tanang posisyon sa mga labor, management, ug government stakeholders bahin sa nag-unang minimum wage rate sa rehiyon.
Gipasalig usab niini ang transparency, inclusivity, ug tripartism sa proseso sa pagtakda sa sweldo, pinaagi sa pagtugot sa mga apektadong sektor nga ipahayag ang ilang mga sentimento sa nag-unang socio-economic nga mga kondisyon sa Central Visayas.
Gidugang usab niini nga ang tanang posisyon ug rekomendasyon nga isumite atol sa mga hearing pagaisipon pag-ayo sa mga deliberasyon.
Ang Central Visayas wage board nagpagawas sa pasalig samtang gipahigayon niini ang unang public hearing niadtong Lunes, Agosto 24, sa DepEd Ecotech Center sa Lahug, Cebu City, ug ang ikaduhang public hearing gikatakda nga ipahigayon karon, Martes, Agosto 25, sa Bethel Guest House sa Dumaguete City, Negros Oriental.
Samtang ang katapusang duha ka public hearings gikatakda sa Septiyembre 3 ug 4 sa sa Pusok, Lapu-Lapu City ug One Central Hotel sa Cebu City.
