Moabut sa 81 ka mga health personnel gikan sa Cebu Provincial Hospital-Bogo City (CPH-Bogo) ug usa gikan sa CPH-Carcar City ang pormal nga nanumpa niadtong Miyerkules, Agosto 26, human sa ilang regularisasyon.
Gipangulohan ni Gov. Pamela Baricuatro, ang oath-taking ceremony nga gipahigayon sa CPH-Bogo, nga nag-ila sa dedikasyon ug katuigan sa serbisyo sa mga trabahante sa ospital nga nagserbisyo sa mga tawo sa Amihanang Sugbo.
Ang 81 ka mga personahe naglakip sa mga nurse, medical technologist, radiologic technologist, nursing attendant, ug mga midwife.
Gipahinumdoman sa Gobernadora ang mga bag-ong na-regular nga empleyado nga magpabilin nga komitado sa ilang responsibilidad isip mga alagad sa publiko.
Pipila sa mga health-care personnel nga na-promote nagpasalamat sa administrasyon gumikan kay sagad niini natuman ang ilang damgo nga ma-regular human sa pipila ka mga katuigan.
Gipasalig usab ni CPH-Bogo Chief of Hospital Dr. Zoraida Yorango sa ubang mga personahe sa ospital nga laing batch sa regularization ang gilauman sa umaabot.
Ang regularization kabahin sa mga paningkamot sa Kagamhanan sa Probinsya sa Sugbo sa pagpalig-on sa healthcare workforce niini ug pag-ila sa serbisyo sa mga personahe nga nagpahinungod sa mga katuigan sa pagserbisyo sa mga pasyente sa mga ospital sa probinsya.
