Nasikop sa mga awtoridad ang 125 ka buhing baboy nga gidala gikan sa Negros Oriental paingon sa Badian, Cebu, sa adlawng Sabado sa buntag, Agosto 29, 2026. taliwala sa padayon nga pagdili sa probinsya sa mga baboy ug mga produkto sa baboy gikan sa mga lugar nga naapektuhan sa African Swine Fever.
Nakadawat og report ang kapulisan sa Badian gikan sa usa ka concerned citizen bahin sa tulo ka barko nga giingong nagdala og mga buhing baboy gikan sa Negros Island Region nga midunggo sa Sitio Manay-as, Barangay Lambug.
Niresponde ang kapulisan, uban sa Badian Municipal Livestock Coordinator ug sa Philippine Coast Guard, ug didto na-intercept ang usa ka truck nga puno sa mga binuhing baboy.
Gikataho nga padulong unta sa Dakbayan sa Talisay, Dakbayan sa Sugbo ug Dakbayan sa Mandaue ang truck. Ang drayber, nga giila nga alyas Arnel, 44, residente sa La Libertad, Negros Oriental, gitugyan ngadto sa mga awtoridad alang sa angay nga aksyon.
Kahinumdoman nga ang Probinsya sa Sugbo nagpatuman og 45 ka adlaw nga pagban sa pagpasulod sa mga buhing baboy, karne sa baboy, ug mga produkto sa baboy gikan sa Negros Island Region ug uban pang mga lugar nga apektado sa African Swine Fever ubos sa Executive Order No. 38.
Ang pagdili gipalugwayan og laing 45 ka adlaw pinaagi sa Executive Order No. 44, Series of 2026.
Temporaryong gidala ang mga nasakmit nga baboy sa usa ka landfill sa Barangay Talayong, Badian, alang sa hustong paglabay.
