Dili angay ibaliwala sa gobyerno sa Pilipinas ang bag-o lang nga pahayag sa Embahada sa China bahin sa nagpadayon nga panaglalis sa teritoryo sa West Philippine Sea, sumala sa eksperto sa international relations ug foreign policy nga si Prof. Renato De Castro.
Kahinumdoman nga niadtong Huwebes, Oktubre 15, gipahayag sa Embahada sa China nga dali ra nilang magamit ang puwersa aron makadaog, apan gipili nila nga dili kini buhaton tungod sa ilang gipasigarbo nga pasalig sa kalinaw.
Sa interbyu sa Bombo Radyo, giingon ni De Castro nga ang maong direkta nga pahayag nagpakita sa gitawag nga “wolf warrior diplomacy”—usa ka pamaagi sa diplomasya nga nailhan sa prangka ug agresibong pinulongan, imbes sa mas kontrolado ug tradisyonal nga diplomatikong komunikasyon.
Gipasabot pa sa eksperto nga nalambigit kini sa pagtan-aw sa China sa kaugalingon isip dominanteng gahum sa rehiyon, ilabina tungod sa kadako sa ilang navy base sa gidaghanon sa mga barko, nga milabaw na sa US Navy niini nga sukdanan.
Dugang pa ni De Castro, gipakita sa pahayag sa China nga gihulagway niini ang Pilipinas isip hinungdan sa mga problema sa rehiyon.
Apan, gipasiugda niya nga adunay katungod ang Pilipinas sa pagpanalipod sa kaugalingong teritoryo batok sa mga pagpanghilabot.
Gihisgotan usab niya ang kasaysayan sa paggamit sa China og puwersa sa mga panagbangi, lakip ang gubat tali sa China ug India niadtong Oktubre 1962 ug ang panagbangi sa Vietnam.
Matod ni De Castro, imbes nga mahadlok sa maong mga taktika, kinahanglan nga palig-onon sa Pilipinas ang panaghiusa sa nasud, ipakita ang kalig-on niini, ug padayon nga pauswagon ang kapasidad sa Armed Forces of the Philippines (AFP).
