CENTRAL VISAYAS- Misaka ang respiratory consultations sa upat ka ospital nga gimonitor sa Department of Health-Central Visayas (DOH-7), gikan sa 2,778 niadtong ikatulong quarter sa 2025 ngadto sa 3,524 sa samang panahon karong 2026.
Matod ni Dr. Joshua Brillantes, regional director sa DOH-7, posibleng usa sa mga hinungdan sa pagsaka ang nagkagrabeng kalidad sa hangin sa Metro Cebu, bisan wala pay direktang ebidensya nga nagkonektar sa polusyon ug sa pagtaas sa mga konsultasyon.
Pinakadako ang pagsaka sa Cebu South Medical Center, diin misaka ang konsultasyon gikan sa 847 ngadto sa 1,407.
Misaka usab ang mga konsultasyon sa Vicente Sotto Memorial Medical Center ug Governor Celestino Gallares Memorial Medical Center sa Bohol. Sa laing bahin, mikunhod ang gidaghanon sa St. Anthony Mother and Child Hospital sa Cebu City.
Samtang, nagtala ang Environmental Management Bureau-7 (EMB-7) og Air Quality Index (AQI) nga 172 sa Metro Cebu niadtong Oktubre 16, nga giklasipikar nga “very unhealthy” tungod sa PM2.5.
Gipasidan-an sa DOH nga ang polusyon sa hangin mahimong makapasamot sa mga sakit sa respiratory system, sama sa asthma ug chronic obstructive pulmonary disease (COPD).
Giawhag ang publiko nga likayan ang mga lugar nga adunay hugaw nga hangin ug mogamit og N95 o KN95 mask kon gikinahanglan ang paggawas.
