Gipahayag sa Department of Social Welfare and Development (DSWD) nga ang gobyerno sa Pilipinas sayo nga mitubag sa hulga sa El Niño sa tibuok nasud.
Matod ni DSWD Secretary Rex Gatchalian, naglatid na ang gobyerno og mga lakang ug tubag aron atubangon ang mga epekto niining panghitabo sa panahon, bisan sa wala pa magsugod ang nagkalain-laing sektor sa pagbati sa epekto sa hulaw.
Lakip niining mga lakang ang pagsiguro nga adunay igong suplay sa pagkaon, tubig, ug kuryente, ingon man ang pagpangandam sa mga serbisyong panglawas.
Nag-andam usab ang DSWD og daghang stock sa mga family food pack alang sa mga apektadong komunidad, dugang pa sa paghatag og mga food pack ngadto sa mga pamilyang naapektuhan sa ubang mga kalamidad, sama sa mga bagyo, kusog nga linog, ug uban pa.
Dugang pa ni Gatchalian nga gipalapdan sa ahensya ang sakop sa mga inisyatibo nga Local Adaptation to Water Access (LAWA) ug Project BINHI (Breaking Insufficiency through Nutritious Harvest for the Impoverished) aron makahatag og tabang sa mas daghang benepisyaryo.
Pinaagi sa mga programang LAWA ug BINHI, nagtukod ang DSWD og mga pasilidad alang sa pagtipig og tubig ug naghatag og mga sistema sa pagsala sa tubig (water filtration systems) ngadto sa mga komunidad nga nanginahanglan niini.
Nanawagan usab ang Secretary ngadto sa publiko nga magdaginot sa tubig, nga makatabang sa pagpagaan sa epekto sa El Niño ug pagsiguro nga magpabiling igo ang suplay sa tubig sa tibuok nasud.
