PROVINCE OF CEBU-Mipatim-aw na sa publiko ang indibidwal nga mikiha ni Cebu Provincial Governor Gwendolyn Garcia sa disqualification case niini nga gipahamtang ngadto sa buhatan sa Commission on Elections sa alegasyon kalapasan niini sa probisyon sa Omnibus Election Code.
Ang reklamante kay mao si Atty. Julito Añora Jr. diin giubanan sa iyang legal counsel nga si Atty. Inocencio dela Cerna sa paghatod niini sa maong kaso sa Comelec Cebu Province nga nakabase ang buhatan sa Kapitolyo sa Sugbo nga nahitabo kagahapong adlawa sa Biyernes, Mayo 9, 2025.
Sa eksklusibong pakighinabi sa Bombo Radyo Cebu Newsteam kay Atty. dela Cerna diin matod niini nga dili ‘politically motivated’ ang ilang kaso nay nanukad kini sa seryosong alegasyon sa paggamit sa Gobernador sa resources sa kagamhanan para sa iyang politikanhong interes ilabi na karon panahon sa eleksyon.
Tulo ka mga kaso ang giduso nila Atty. Añora ug Atty. dela Cerna nga ang una mao nga si Garcia nanghimakak sa iyang Certificate of Candidacy (COC) sa dihang wala gisaysay niini nga aduna kiniy kaso nga naka-ong-ong sa Korte Suprema nga mao ang Hilario Davide II vs Garcia ug Agnes Magpale vs Garcia.
Ikaduha nga kaso nga giduso niini kay mao ang padayong pagsukwahi no Garcia sa preventive suspension order gikan sa Office of the Ombudsman sa iyang kasong illegal nga pagluwat og special quarry permit sa Mananga River niadtong tuig 2024.
Ang ikatulog mao ang pagpanghimulos ni Garcia sa Cebu Provincial Government pinaahi sa Public Information Office niini o “Sugbo News” sa iyang public relations stunts nga naka-cover lang sa Gobernadora og dili na sa kaayohan sa Probinsiya sa Sugbo.
Dugang pa niini nga dili politically motivated ilang aksyon sanglit na timing ra kini sa pagkuha sa ebidensya sa complainant nga mipahibalo nga dili konektado sa bisag unsang partido sa politika ilabi na sa kaatbang sa Gobernadora.
