Nagpatrolya ang Armed Forces of the Philippines (AFP) sa Luzon Strait ug nagpahigayon og joint military exercise uban sa Estados Unidos sa Mindanao.
Matod ni Northern Luzon Command (Nolcom) commander Lt. Gen. Fernyl Buca, sa Luzon, ang Northern Luzon Command (Nolcom) naglunsad og maritime patrol sa kadagatan sa La Union hangtod sa Batanes sukod niadtong Abril 9 ug milungtad ngadto sa Abrik 10.
Nipahigayon usab ang BRP Gregorio del Pilar (PS15), BRP Heracleo Alano (PC380), ug BRP Nestor Reinoso og maritime drills samtang nagpatrolya sa Luzon Strait.
Ingon man nga nakompleto usab nila ang resupply mission sa mga tropa nga nadestino sa mga isla sa Batanes, apil na ang naval detachment sa isla sa Mavulis nga nagsilbi nga puy-anan sa mga sundalo nga nagbantay sa pinakaamihanan nga teritoryo sa nasud.
Ang padayon nga pagpatrolya sa mga barko sa Pilipinas sa kadagatan nag-abot taliwala sa mga taho sa presensya sa Chinese research vessels sa amihanang bahin sa nasod human ang chief of staff sa AFP nga si Gen. Romeo Brawner Jr. nimando sa Nolcom nga mangandam sa posibleng pag-atake sa Taiwan diin mokabat sa 250,000 ka mga overseas Filipino workers (OFWs) ang nagtrabaho.
Sa Mindanao, ang Western Mindanao Command nagpahigayon og Marine Exercise (MAREX) 2025 kauban ang US Marine Corps sa Barangay Penansaran, Datu Blah Sinsuat, Maguindanao del Norte.
Dinhi, gihimo ang simulated operations lakip na ang live fire exercise ug Full Mission Profile Amphibious Assault nga, sumala ni Westmincom commander Lt. Gen. Antonio Nafarrete, nagpakita sa kalig-on sa kooperasyon sa militar tali sa Pilipinas ug Estados Unidos ug kaandam sa komplikadong littoral operational environment.
