CEBU CITY-Gitun-an karun sa kapulisan sa Cebu City Police Office ang pagpatuman ug full take-over sa Cebu City Second Chance Center.
Kini human nga lain na usab nga panghitabo diin na-eskapohan ug siyam ka mga Children in Conflict with the Law (CICL) ang naasoy nga pasilidad.
Gibutyag ni Cebu City Police Office Director, Police Colonel Ireneo Dalogdog, nga mitawag kaniya si Cebu City Mayor Michael Rama sa kamandoan nga i-takeover na sa kapulisan ang pagbantay sa pasilidad arun nga dili na subling mahitabo ang pag-eskapo sa mga CICL.
Matud pa, magpadala ug personnel ang CCPO sa Cebu City Second Chance Center diin gilangkoban kini sa mga sakop sa City Mobile Force Company (CMFC).
Sa pagkakarun giingong nagpahigayon pa ug meeting ang habig sa CCPO kauban si City Administrator Atty. Collin Rusell ug Cebu City Councilor Philip Zafra, ang chairman sa Committee on Peace and Order sa dakbayan.
