CEBU CITY- Naka- heightened alert karon ang Cebu City Police Office, human sa pagkasikop ni kanhi Presidente Rodrigo Duterte niadtong Martes, Marso 11, 2025.
Kini ang gipaibalo ni Police Lieutenant Colonel Maria Theresa Macatangay, ang Deputy City Director for Operations sa CCPO, sa pakighinabi sa Bombo Newsteam nga ilang giandam ang Civil Disturbance Management ug uban pang mga yunit aron matubag ang posibleng mga rally sa mga dumadapig ni Duterte.
Bisan paman niini, gihatagan og gibug-aton ni Macatangay nga gitugutan ang mga tigpasiugda sa rally, apan kinahanglang makakuha og permit gikan sa kagamhanan sa dakbayan sa Sugbo ug dili makabalda sa katungod sa ubang mga indibidwal sa Dakbayan.
Gani, gikan sa pagkasikop sa kanhi nga presidente anaa nay pipila ka mga lihok protesta sa kadalanan, apan kining tanan malinawon.
Dugang pa ni Macatangay, nga malipayon sila nga maayo ang pamatasan sa mga nisalmot sa ikaduhang adlaw sa prayer rally aron pagpakita sa ilang hugot nga suporta sa dinakpan nga kanhi Presidente.
Una niini, kaniadtong Martes sa gabii, ang Philippine National Police (PNP) mimando sa ilang mga rehiyonal nga yunit ug nasudnong suporta nga mga yunit nga anaa sa “heightened alert.”
