METRO CEBU-Gibulabog sa duha ka mga dagkong sunog ang Metro Cebu niadtong Enero 24, 2025.
Diin ang unang sunog kay mitumaw sa pasado alas 2 sa hapon sa Purok Sewage, Barangay Pusok sa dakbayan sa Lapu-Lapu sa City Hall pabor sa Mactan-Benito Ebuen Air Base.
Sa inisyal nga imbistigasyon sa Lapu-Lapu City Fire Station nga posibling nagsugod ang maong sunog sa usa ka panimalay tungod adunay usa ka 4-anyos nga bata nga nagduwa og lighter nga dali nga mikatay sa foam hinungdan sa pagdilaob sa kalayo.
Milanat pa sa ika-limang alarma ang maong sunog nga mikabat sa dili muminos 30 sa mga panimalay ang naugdaw nga gibana-banang muabot sa gatosan ka mga indibidwal ang nabiktima sa sunog.
Sa dili madugay girespondihan usab ang mitumaw nga sunog sa Sitio Pucab, Barangay Looc dakbayan sa Mandaue, doul sa local water bottling plant ug unibersidad sa maong dapit ug gipasaka sa ika-upat nga alarma ang maong sunog.
Sa pakighinabi sa Bombo Radyo Cebu kay Ramon Bermon, ang GAD Focal CSWD sa Lapu-Lapu City gipaambit niini nga ilang siguraduhon nga mahatagan og hinabang ang mga apektado inabagan sa mga nagkandaiyang ahensya.
Dugang niini nga nahuman na nila ang partial nga data sa mga nasunugan.
Gikumpirmar usab ni Bermon nga wala silay natala nga naangol sa mitumaw nga sunog.
