CEBU CITY- Patay ang usa ka gidudahang tigpayuhot og ginadiling drugas samtang laing duha ang nasikop sa pinusilay tali sa mga suspek ug han-ay sa kapolisan sa Waterfront Police Station sa Cebu City Police sa Sitio Silangan 2, Barangay Tejero, dakbayan sa Sugbo pasado alas 3 sa hapon gahapon Huwebes, Enero 23. , 2025.
Ang napatay nga suspek giila nga si Fredo Juntong, pier laborer sa Sugbo kinsa ex-convict usab sa kasong pagdula og ilegal nga drugas nga nailhang siga sa nahisgutang barangay.
Giila ang mga kauban niini nga nadakpan nga sila si Dionesio Canania alyas “Isyot”, 37 anyos ug Ronie Porquiado, 50 anyos nga residente usab sa maong dapit.
Nakuha sa ilang hideout ang pakete sa ilegal nga drugas, repacking equipment, liboan ka kuwarta ug kalibre .45 nga armas.
Sa ekslusibong pakighinabi sa Bombo Radyo Cebu kang Police Major John Lynbert Yango, ang hepe sa Waterfront Police Station sa Cebu City Police, gitino niini nga ang ilang mga operatiba nakakita sa usa ka suspek nga daling misulod sa ilang hideout ug mikuha og armas hinungdan nga nagbinayloay sila og bala apan napakyas kini sa pag-igo sa bisan usa ka polis.
Dinhi, nibalos sa pagpusil ang mga kapulisan ngadto sa suspek nga maoy hinungdan sa iyahang kamatayon.
Nasuta nga ang suspek, gitambagan pa sa usa sa iyang mga kauban nga mo-surrender na apan nagmagahi kini ug di na magpadakop nga buhi hinngdan sa iyahang daling kamatayon.
