CEBU CITY-Abagahon sa Kagamhanan sa Dakbayan sa Sugbo ang tanang gasto sa tulo ka manag-igsuon nga sila si Sachna Lexy Siaboc, 6-anyos, Razan Kyle, 4-anyos, ug si Athena Lexy, 3-anyos nga namatay sa sunog sa Sitio Mabapo, Avocado St., Brgy. Mambaling gahapon sa buntag Marso 29.
Matud ni Konsehal Joel Garganera nga gimando ni Mayor Raymond Alvin Garcia nga motabang ang City Hall sa pagpahiluna sa mga bata.
Gikataho nga ang inahan sa mga bata nga si Ynica Marie Siaboc kay anaa sa trabahoan sa dihang niulbo ang sunog sa ilang balay, samtang wala usab ang amahan sa mga bata nga si Lerio Abella kay nilakaw kini aron sa pagkuha sa inahan sa mga bata.
Nasayran usab nga wala ang mga nagpuyo sa ground floor sa maong balay dihang nahitabo ang insidente ug matud ni Senior Fire Officer 2 (SFO2) Wendell Villanueva, CCFS information officer nga dihang nagsugod ang sunog, gisinggitan sa silingan ang mga bata gikan sa gawas aron moambak sa ikaduhang andana.
Milabay ang pipila ka minuto apan wala motubag ang mga bata.
Gituohan sa mga otoridad nga na-suffocate na ang ma bata sa aso hinungdan nga wala na kini mitubag.
Ang sunog nakaguba sa kinatibuk-ang 25 ka balay ang hingpit nga naugdaw diin 5 niini ang partially burned ug gibanabana nga mokabat sa P750,000 ang kinatibuk-ang danyos niini.
Nunot ning maong trahedya, subling gipahinumduman ni Villanueva ang ilang kanunay nga pahinumdom sa publiko nga likayan ang pagbilin sa ilang gagmayng mga anak sa ilang mga panimalay.
Gihatagan niya og gibug-aton nga ang mga bata, isip bahin sa huyang nga sektor kauban ang mga mabdos ug senior citizen, kinahanglan nga bantayan pag-ayo sa tanan nga oras tungod kay dili sila makaatiman sa ilang kaugalingon sa mga emerhensya nga kahimtang sama sa sunog.
