CENTRAL VISAYAS- Nakatala ang Department of Health (DOH) Region 7 og kinatibuk-ang 141 ka kaso sa leptospirosis sa mga dapit sa Cebu ug Bohol gikan Enero 2025 hangtod Agosto 5, 2025.
Sumala ni Dr. Jonathan Neil Erasmo, assistant regional director sa DOH 7, kasagaran sa mga pasyente gikan sa mga dakbayan sa Sugbo ug Mandaue.
Sa tibuok 141 ka kaso, 114 ang mga lalaki (81 porsyento), samtang 27 ang mga babaye (19 porsyento).
Wala pa matino sa DOH 7 ang eksaktong rason nganong naapil sa mga pasyente ang pinakabata, usa ka masuso nga usa ka tuig ang edad.
Apan, gituohan nga ang pagtaas sa mga kaso nasangpot sa sunod-sunod nga pag-ulan sa Hulyo 2025 nga misangpot sa daghang pagbaha sa mga probinsya.
Gipasabot sa DOH nga ang leptospirosis usa ka bakteryal nga sakit nga mapasa pinaagi sa pagkontak sa tubig baha o yuta nga kontaminado sa ihi sa mga nataptan nga mananap, ilabi na sa mga ilaga.
Walay natala nga namatay sa rehiyon tungod sa sakit, apan nagpahimangno ang DOH 7 nga makapahadlok ang pagtaas sa mga kaso.
Gipahimangnoan ang publiko, labi na kadtong nakasinati og pagkahugaw sa tubig baha ug adunay bukas nga samad, nga magpakonsulta dayon sa medikal nga propesyonal alang sa dali nga pag-ila ug pagtambal sa leptospirosis.
