BOLJOON, CEBU- Nangandam na sa pagpasaka og mga kasong criminal ang kagamhanang lalawigan sa Sugbo batok sa pamunoan sa National Museum of the Philippines (NMP) mahitungod sa kapakyas gihapon mauli sa Boljoon Pulpit Panels.
Kini nga kasayuran ang gipamahayag ni Cebu Provincial Governor Gwendolyn Garcia inabagan a mga kadakuan sa Archdiocese of Cebu sa pakighinabi niini sa mga sakop sa tigbalita sa Kapitolyo kagahapon adlawa sa Lunes, Enero 13, 2025.
Matod pa nga adunay inisyal nga upat (4) ka kasong ipasaka batok kang Jeremy Barns, ang Director-General sa NMP nga may kalabutan sa paggumahi niini sa pag-uli sa mga pulpit panels sa Archdiocesan Shrine of Patrocinio de Maria Santisima o mas giilang Boljoon Church.
Ang mga nahisgutan nga upat ka religious artifacts kay gikatahong gikawat sa simbahan sa Boljoon niadtong dekada 1980s nga mitumaw sa NMP sa bag-ohay lang.
Gawas kang Barns, si Gobernadora Garcia kay mopasaka usab og tukmang kaso batok kang Edwin ug Aileen Bautista, ang kanhi tag-iya sa mga pulpit panels, kinsa midonar sa mga religious artifacts ngadto sa NMP niadtong Pebrero 2024.
Ang mga kaso naglakip sa paglapas sa Code of Conduct and Ethical Standards for Public Officials and Employees, Anti-Fencing Law, Anti-Graft and Corrupt Practices Act, ug dugang mga paglapas sa National Cultural Heritage Act of 2009.
