PROVINCE OF CEBU- Gi-atras sa APO Land and Quarry Corporation (ALQC) ang pagduso niini og Temporary Restraining Order (TRO) batok sa kagamhanang lalawigan sa Sugbo nga girepresentaran ni Governor Gwendolyn Garcia sa Regional Trial Court Branch 9 sa Cebu City Hall of Justice kaganihang alas 3 sa hapon rong adlaw sa Miyerkules, Disyembre 11, 2024.
Kini human midirektiba ang kagamhanang lalawigan sa pagpahunong sa tanang “earth-moving operations” sa kumpanya sa dakbayan sa Naga sa habagatang Sugbo niadtong mga nakalabayng semana subay sa Executive Order No. 22 series of 2024.
Kasayran nga ang ALQC mao ang nag-unang supplier sa CEMEX Philippines sa limestone, clay ug greywacke nga raw materials alang sa produksiyon sa semento sa planta niini nga nakabase sa samang habagatang dakbayan sa probinsiya diin aduna silay Mineral Production and Sharing Agreement (MPSA).
Sa pakighinabi ni Governor Garcia sa mga sakop sa media nga gitataw niini nga ang tumong sa iyang kamandoan kay mao ang pagpanalipod sa mga katawhan nga nagpuyo sa maong dapit susama sa nahitabo niadtong Septiyembre 20, 2018 diin 78 ka mga kinabuhi nga nakalas ug 5 ang mga nangawala tungod sa grabeng pagdahili sa yuta.
Ipatuman ang maong kamandoan sa buhatan sa Department of Environment and Natural Resources (DENR-7), Mines and Geosciences Bureau (MGB-7), Environmental Management Bureau (EMB-7),kagamhanang dakbayan sa Naga ug sa mga kapulisan niini.
Gihatagan ug gibug-aton sa kagamhanang lalawigan ang kamahinungdanon sa pag-una sa kinabuhi ug sa palibot kay sa interes sa negosyo.
