CEBU CITY-Manghinambid nuon sa mabugnawng lawak sa prisohan sa Mambaling Police Station ang usa ka lalaki human namato sa truck sa bumbero nga miresponde sa sunog nga mituman sa Sitio Lower Galile, Barangay Duljo Fatima ning dakbayan sa Sugbo, kagahapong adlawa sa Dominggo, Enero 5, 2025.
Giila ang dinakpan nga si Rafael Villaver, 42-anyos ug lumulupyo sa maong dapit diin kinsa maoy gitudlo nga namato og nakabuak sa windshield sa firetruck sa Barangay Mambaling Disaster and Fire Brigade tungod kay giingong wala gi-prioritize ang iyang balay ang respondehan sa sunog.
Matod pa sa usa sa personahe sa Barangay Mambaling Disaster and Fire Brigade nga mukabat sa 10 ka mga isog nga kalalakihan ang mihamag sa ilaha sa dihang mubuhat na ila sa ilang trabaho isip bumbero.
Dugang pa nga gikatahong hubog sa ilimnong makahubog ng mga lalaki diin midepensa ra ang mga firefighters nga nagsunod ra sila sa ilang firefighting protocols nga mao ang pagsalbar sa mga posibli pang maluwas nga mga panimalay ug pagpalong sa gigikanan sa sunog.
Sa eksklusibong pakighinabi sa Bombo Newsteam kang Senior Fire Officer 2 Wendell Villanueva, ang tigpamaba sa Cebu City Fire Office diin pursigido silang mupasaka og kaso sa suspek diin mag-atubang kini sa kalapasan sa Indiirect Assault, Damage to Property, Malicious Mischief, ug Disruption to Operations to Firefighters.
