Nasikop ang usa-ka lalaki sa National Bureau of Investigation, human nga nanghulga nga bombahan ang Comission on Elections Central Office.
Giila ang suspetsado nga si Gian Carlo Dela Cruz Maningo, residente sa Casili Hills, Casili Mandaue City.
Gikatahong nagkomento sa nagkalain-laing online groups sa social media ang dinakpan nga nag-offer og reward ngadto sa nibisan kinsa nga makatanom og makapabuto og bomba sa Comelec Central Office bayad sa kantidad nga P5 milyones.
Gibutyag sa NBI CEVRO regional director Rennan Oliva, nga nakadawat sila og report gikan ni Justice Undersecretary Nicolas Ty, niadtong adlawng Martes, Mayo 13, 2025 sa giingung pag-panghulga sa suspitsado pinaagi sa usa ka post.
Atol sa pagkasikop niini sa kaugalingong panimalay, wala ra usab misupak ug giangkon ni Maningo ang mga pasangil.
Mag-atubang og kasong “Inciting to Sedition” ubos sa Article 142 sa Revised Penal Code, maylabut usab sa RA 10175 kon “Cybercrime Prevention Act of 2012”. | Bombo Nathaniel Sandoval
