CEBU CITY-Gibasura sa Office of the Ombudsman ang mga mosyon ni preventive suspended Cebu City Mayor Michael Rama ug ubang mga suspendidong opisyal sa City Hall nga tangtangon ang mando sa ilang preventive suspension nga gisang-at sa managlahing petsa niadtong Mayo 2024.
Ang resolusyon giluwatan ni Ombudsman Samuel Martires nga pinetsahan og Hunyo 20 ug nadawat sa mga sakop sa media niadtong Domingo, Hulyo 21.
Sa ilang mosyon, gilatid sa respondent-movants ang ilang mga rason sa pagtangtang sa Preventive Suspension Order, nga gisumada sa resolusyon ni Martires.
Una nilang pangatarungan nga ang ilahang katingud nga masayud sa mga akusasyon nga ibato anila kay wala sa hustong proseso butang nga grabeng nalapas sa ilahang tawhanong katungod.
Ikaduha, ilang giangkon nga ang maong kamanduan gibase lang sa biased information gikan sa Joint Complaint-Affidavit (petsa Pebrero 23, 2024), nga napakyas sa paghisgot nga si Rama tukma sa panahon nga misang-at og managlahing Petitions for Review sa Civil Service Commission-Central Office niadtong Enero 8, 2024, bahin sa CSC Regional Office No. 7 nga mga resolusyon nga gipagawas niadtong Nobyembre 23 ug Disyembre 11, 2023.
Gihisgotan usab sa mga respondent-movant ang mga kaso diin ang Korte mihukom nga ang Civil Service Commission (CSC), dili ang Ombudsman, ang adunay hurisdiksyon sa mga reassignment sa empleyado sa serbisyo sibil.
Dugang pa, ang Memorandum of Agreement on Complaint Referral System, pinetsahan og Disyembre 12, 2016, tali sa Opisina sa Ombudsman ug sa CSC, nag-ingon nga ang Ombudsman mo-dismiss sa bisan unsang mga reklamo nga may kalabutan sa human resource actions.
Ang mga reklamo nga nag-apelar sa mga desisyon o aksyon nga naglambigit sa kalihokan sa human resource sa Serbisyo Sibil nahisakop sa kini nga kasabutan.
Bisan pa sa mga pangangkon sa respondent-movants, nakita sa Ombudsman nga lig-on ang ebidensya sa ilang pagkasad-an, nga nagpahayag nga ang mga kondisyon alang sa Preventive Suspension Order natuman.
