Lauman nga magsunod-sunod na ang pagpasaka og mga kaso batok sa mga personalidad nga nalambigit sa mga anomalosong flood control projects.
Mao kini ang gipahayag ni Department of Public Works and Highways (DPWH) Secretary Vince Dizon, human gipahibalo sa Presidente nga ang gobyerno nakadakop na og walo ka indibidwal nga nalambigit sa anomalosong proyekto sa Oriental Mindoro.
Atol sa usa ka press conference sa Camp Crame, si Dizon miingon nga ang nahisgutang mga tawo sinugdanan pa lang sa taas nga linya sa mga tawo nga pasakaan og kaso ug mga pangdakpon.
Sa pikas bahin, nipadayag og suporta si Pwersa ng Pilipinong Pandagat (PPP) Party-list Rep. Harold Duterte sa pag-uswag sa mga kaso ug pag-aresto sa mga nalambigit sa flood-control corruption scandal.
Giabiabi usab sa kongresista ang subasta sa mga luhong sakyanan, nga iyang giingon nga nahimong simbolo sa sobra nga paggamit sa pondo sa publiko.
Bisan pa, iyang gipasiugda nga kini pa lang ang unang yugto sa usa ka taas nga dalan paingon sa tinuod nga pagkamay-tulubagon.
