Nakigtagbo si Presidente Ferdinand Marcos Jr., sa mga lider sa turismo sa Japan aron sa pagpalig-on sa relasyon sa duha ka nasud sa sektor sa turismo, dungan sa iyang opisyal nga pagbiyahe ngadto sa Osaka aron mangulo sa inagurasyon sa Philippine Pavilion sa World Expo 2025.
Matud sa Presidente, gitumong sa tigom nga madugangan pa ang gidaghanon sa mga turista nga mobisita sa Pilipinas, ilabi na kay aduna nay 214 ka flights matag semana tali sa Japan ug Pilipinas.
Dugang niini nga gitinguha usab nga makamugna og daghang trabaho alang sa mga Pilipino, makatabang sa daghang negosyo nga motubo, ug masiguro nga daghang mga komunidad ang mobati sa epekto sa usa ka lig-on nga sektor sa turismo.
Sa pakighinabi ni Department of Tourism (DOT) Secretary Christina Garcia Frasco, kinsa miuban sa Presidente atol sa iyang biyahe, iyang gipasiugda ang importansya sa tigum nga nagkutlo sa “very instrumental” nga papel sa mga stakeholder sa turismo sa Japan sa pagmintinar sa Japan isip usa sa mga nag-unang merkado sa nasud, diin ang Japan karon anaa sa ikatulo nga ranggo, sumala ni Frasco.
Subay niini, mipasalig si Frasco sa mga stakeholders sa padayon nga pag-uswag sa imprastraktura, lakip na ang nagpadayon nga pribatisasyon ug pagpausbaw sa mahinungdanong mga tugpahanan sama sa Ninoy Aquino International Airport ug regional hubs, uban ang tumong sa pagdugang sa direktang pag-access sa internasyonal nga mga bisita.
