Nanawagan si Papa Leo XIV alang sa usa ka adlaw nga kalinaw sa tibuok kalibutan, bisan pa man og atol sa Pasko lang, nga dungan sa pagkatawo sa manluluwas nga si Hesukristo.
Sa iyang pakigpulong sa mga tigbalita sa Papal palace, ang Santo Papa mitubag sa pipila ka mga pangutana bahin sa gubat sa Ukraine, ug sumala ni Papa Leo, usa sa mga butang nga nakapasubo kaniya sa miaging mga adlaw mao ang kamatuoran nga gisalikway sa Russia ang hangyo alang sa usa ka Christmas truce o ceasefire.
Niining bahina, gibag-o sa Santo Papa ang iyang panawagan alang sa paghunong sa mga panag-away sa Pasko ug naglaum nga ilang tumanon kini nga panawagan sulod sa 24 oras o usa ka tibuok adlaw nga kalinaw sa tibuok kalibutan.
Gipahayag usab ni Pope Leo ang paglaum alang sa pag-uswag sa kasabutan sa kalinaw sa Middle East, diin ang Phase 2 sa kasabutan gihisgutan karon.
Niining bahina, gidapit ni PopeLeo ang tanan, labi na karong panahon sa Pasko, sa pagpamalandong sa kinaiya ug bili sa kinabuhi sa tawo, ug miingon nga ang Dios nahimong tawo sama kanato aron ipakita kung unsa ang tinuod nga kahulugan sa kinabuhi.
Busa, kini ang paglaum ug pag-ampo sa lider sa Simbahang Katoliko nga ang pagtahod sa kinabuhi sa tawo motubo pag-usab sa matag gutlo, gikan sa pagpanamkon hangtod sa natural nga kamatayon.
Samtang, wala kapugngi sa Santo Papa ang pagpahayag sa iyang kasagmuyo sa bag-ohay lang nga pag-apruba sa iyang estado sa Illinois sa assisted suicide para sa mga hamtong nga adunay mga sakit nga terminal o usa ka prognosis nga unom ka bulan o mas mubo pa sugod sa Septyembre 2026.
Gipasiugda ni Papa Leo ang panginahanglan sa pagtahod sa kasagrado sa kinabuhi gikan sa sinugdanan hangtod sa katapusan, apan subo lang, matod niya, si Gobernador JB Pritzker sa Illinois nakahukom gihapon nga pirmahan ang giingon nga balaodnon, mao nga ang Santo Papa nasagmuyo pag-ayo.
