Padayon ang Senado sa pagpangandam alang sa nagsingabot nga impeachment trial batok kang Bise Presidente Sara Duterte.
Kini nga kalihokan, gikompirmar ni Senate Spokesperson Arnel Bañas, diin sa Hunyo 2 ipahigayon ang pagbasa sa articles of impeachment, samtang sa Hunyo 3, manumpa ang mga senador aron sugdan ang impeachment trial.
Giklaro usab ni Bañas nga ang manumpa lang karong Hunyo 3 mao ang mga senador sa 19th Congress.
Tungod kay naa na sa Senado ang bola, matod niya, bisan unsa pa ang rason nga dili ipadayon, desisyon kini sa taas nga balay sa Kongreso.
Matod niya nga sa pagkakaron, wala pay nadawat nga instruksiyon si Bañas nga dili na ipadayon ang pending trial batok kang VP Sara.
Samtang, gikompirmar usab sa tigpamaba sa Senado nga ang House prosecution panel adto mismo sa Senado aron basahon ang articles of impeachment batok kang Duterte.
Dugang pa ni Bañas nga dili madiskaril ang mga katungdanan sa mga senador sa legislative tungod kay gitakdang sugdan ang impeachment trial sa buntag ug sa hapon magsugod ang sesyon sa duha ka balay sa Kongreso.(Bombo Irene Ardiente)
