Gidayeg ni Speaker Ferdinand Martin Romualdez si Presidente Ferdinand Marcos Jr., nga nahimo niini mapauli sa Pilipinas ang Pinay drug mule nga si Mary Jane Veloso nga nag-atubang sa death row sa Indonesia.
Kini human gipahibalo ni Pres. Marcos nga makabalik na sa Pilipinas si Veloso human sa 14 ka tuig nga pagkapriso.
Gikalipay usab kini sa pamilyang Veloso sa Nueva Ecija.
Matud pa sa Speaker nga ang gihimo sa Presidente kay nagpamatuod nga iyang gihatagan og prayoridad ang kaayohan sa mga Pilipino, ilabi na sa mga OFW.
Dugang ni Speaker Romualdez nga ang pagbalik ni Veloso sa Pilipinas makonsiderar nga kadaugan sa paglaum ug diplomasya ug hustisya.
Gipasalamatan ni Speaker Romualdez ang presidente sa Indonesia nga si Prabowo Subianto kalabot sa maong lakang.
Gipasalig ni Romualdez nga magpadayon kini sa pagpakigkomunikar sa nagkalain-laing ahensya sa gobyerno nga naghimo og mga polisiya aron mapanalipdan ang mga OFW ug ilang pamilya.
