Subling gipamatud-an ni House Speaker Romualdez ang pasalig sa House of Representatives sa paggahin og igong pundo ug klarong polisiya alang sa modernisasyon sa depensa sa nasod.
Kini subay sa pangandoy ni Presidente Ferdinand R. Marcos, Jr. nga ang Pilipinas adunay estratehikong estratehiya sa seguridad.
Gikataho nga si Speaker Romualdez nagtuo nga ang pagbaton og lig-on nga nasudnong depensa makatabang sa pagmugna og usa ka lig-on nga palibot aron madani ang daghang mga mamumuhunan ug makapadasig sa pag-uswag sa ekonomiya sa nasud, nga makamugna og daghang mga trabaho og makatabang sa paghaw-as kanila gikan sa kakabus.
Subling nanawagan usab si Speaker Romualdez sa mga Pilipino nga padayon nga maghiusa sa pagtuboy sa soberanya sa nasud ug pagpanalipod sa integridad sa atong teritoryo.
Samtang, gidayeg ni Speaker Romualdez ang pinakaulahing serye sa military exercises sa mga tropa sa Pilipinas ug Estados Unidos, nga matud niya makapalig-on sa kapabilidad sa duha ka nasud.
Matud ni Romualdez nga importante ang maong mga ehersisyo aron mapalig-on ang abilidad sa pagpanalipod sa teritoryo ug sa mga lungsoranon.
Ang military exercise naglakip sa Marine Exercise (MAREX) 2025, nga nagsugod niadtong Marso 30 ug opisyal nga nahuman niadtong Abril 11.
Gidayeg ni Speaker Romualdez kini nga kolaborasyon tungod sa pagpakita sa usag usa nga kusog sa ilang tinguha sa pagpadayon sa seguridad sa Indo-Pacific nga rehiyon, nga usa ka pamuhunan sa pagkaandam ug pagsalig.
Sa samang higayon, ang “Salaknib,” usa ka pulong nga Ilokano nga nagkahulogang “panagang,” gipahigayon usab ubos sa pagdumala sa Philippine Army (PA) ug US Army Pacific (USARPAC).
Ang Unang Bahin sa Salaknib ipahigayon gikan sa Marso 24 ngadto sa Abril 11, samtang ang Ikaduhang Bahin gikatakda nga ipahigayon gikan sa Mayo 19 ngadto sa Hulyo 20.
Kabahin sa pagbansay sa Salaknib naglakip sa mga sistema sa komunikasyon, live fire of field artillery, sling load helicopter operations, ug medical evacuations.
Si Speaker Romualdez mohatag og gibug-aton nga ang MAREX 2025 ug Salaknib joint exercises gidesinyo aron sa pagpalawom sa depensa nga kaandam ug kooperasyon, ug dili gituyo sa pag-aghat sa panagbangi.
Gipasiugda ni Speaker Romualdez nga ang mga kahanas sa humanitarian assistance, disaster response, ug peacekeeping usa ka importante nga bahin sa duha ka mga pagbansay.
