MANDAUE CITY-Pagpanimalos ang posibling maoy nakaaghat sa kanhi “mangasalay” nga si Jeffery Tan sa pagpatay kang Roger Perez sa barangay hall sa Mantuyong, dakbayan sa Mandaue.
Matod ni Police Major Andy Michael Roque, hepe sa Centro Police Station, nga si Tan, 31, nadakpan samtang nagtago-tago sa Barangay Tabok, sa dakbayan usab sa Mandaue, gahapon sa udto Lunes o pipila lang ka oras human niya gidunggab patay si Perez.
Ang duha nagtrabaho kaniadto isip mga “mangasalay” sa Barangay Mantuyong.
Matud ni Roque nga ilang nasikop si Tan atol sa follow up operation.
Kasamtangang gitanggong si Tan sa detention facility sa Centro Police Station samtang nangandam ang kapolisan sa pagpasaka og kasong pagpatay batok kaniya.
Matod ni Roque nga nakadawat sila og impormasyon nga si Perez, 49, giingong nidunggab sa amahan ni Tan 23 ka tuig na ang nakalabay.
Kini basi sa saysay ni Christian Demape, ig-agaw ni Perez, nga si Tan, nga nag-edad pa lang og otso anyos, nakakita ni Perez nga nidunggab sa iyang amahan, nga naigo sa liog.
Ang amahan ni Tan naluwas sa insidente sa pagpanunggab, apan namatay kini sa ulahi tungod sa atake sa kasingkasing.
Matud pa ni Demape nga giingnan usab ni Perez si Tan nga “tubo dayon kay maghulat ko nimo.”
Si Perez, kinsa lumad nga taga Barangay Mantuyong, kasamtangang nagpuyo sa Barangay Guinsay, dakbayan sa Danao sa amihanang bahin sa Sugbo.
Nibalik siya sa Barangay Mantuyong niadtong Domingo aron hulaton ang gikatakdang pagdungog sa kaso nga una nang gipasaka batok kaniya. Apan wa matino ni Roque kung unsa ang kaso.
Giingong gidunggab ni Tan si Perez samtang nag-inom sila og ilimnong makahubog uban sa pipila ka mga lalaki sa Barangay Mantuyong nga makita sa CCTV footage nga nakuha sa kapulisan gikan sa mga personnel sa Barangay Mantuyong.
