PROVINCE OF CEBU-Nakadawat na og bayad o compensation gikan sa kagamhanang lalawigan sa Sugbo ang dili muminos 19 ka mga tag-iya og luna sa lungsod sa Daanbantayan sa planong proyekto nga 150-megawatt nga solar power plant sa amihanang bahin sa probinsya.
Ang mga tag-iya kay miuyon sa pagbaligya sa ilang propeyidad ngadto sa Kapitolyo aron sa hingpit nga pagpatuman sa pangandoy nga baratong suplay sa kuryente sa ilang lugar.
Mismong si Cebu Provincial Governor Gwendolyn Garcia ang mitunol sa mga cheke ngadto sa inisyal nga 19 ka mga tag-iya sa luna niadtong Enero 8 diin ang bayad kay anaa sa P300,000 ngadto s P10-milyones nga nagdepende sa gilapdon sa yuta.
Matod pa nga anaa na sa 28 ka mga tag-iya og luna ang nakadawat na og bayad gikan sa Kapitolyo kon diin ang unang 9 nga nakadawat kay naunang nakabayran wa lapa sa ang Enero 8 nga panagtigom sa Kapitolyo.
Ang presyo sa luna kay gitakda sa appraisal committee sa Kapitolyo nga gipangulohan ni 4th District Board Member Minuel Carmela “Mela” Franco.
Dakong pasalamat sab ni Daanbantayan Municipal Mayor Sun Shimura sa Kapitolyo sa progresibong proyektong gipahimutang sa ilang lungsod sa amihanang bahin sa lalawigan.
Ang maong proyekto nga solar power plant kay gidumala sa Kapitolyo sa pakig alayon sa Spanish-based Renewable Energy Company nga Acciona Energia Global nga itukod sa 185 ka ektarya subay sa 48 ka luna sa Barangay Talisay sa lungsod sa Daanbantayan.
